Guten Abend Herr Ryter

Und wie geht es Ihnen geniessen Sie die Ferien?     

Grüessli nitli

Ja hollo nitli

Danke für d Nachfrag! Du eigentlich häti i "Ä Cheib voll z'korrigiere". Ha aber nüt gmacht, bis jitz, - ihr heit mi so gstesst ... Bi aber uf em Töff gsi, chasch nacheluege unter Motorrad -> Touren -> Frühlingsfahrt. Sisch ärdeschön gsi!

Ude chunsch mit de Boys klar hie im Forum, s' hett doch scho vinechli Lüt gäh!

Bi alle dankbar wo mitmache, isch doch super u macht Spass!

Machs gut, u lehr mer flissig, mir wei doch ä Top-LAP mache, ja?

Gruess 

Ig findes äs super Sach das Forum!     Äs macht mega Spass mit denä Lüt chli z plöiderlä. Äs GROSSES LOB a Euch! 

U am lehrä bi ig o flissig machä geng einisch ihr Wuchä mit Marco ab u den tüe mir üs gägäsitig abfragä.

Ha aber eifach glich chli bammel! 

Grüessli nitli

Hallo nitli

Danke für dini Blueme, mir macht's o Spass, es sötte nume no me vor Schuel mitmache, z.T heimer halt scho trägi Gschtalte! Aber i gibe dr Gloube nid uf, da chöme scho no es paar drzue.

Nid Angscht ha vorder LAP. Ä LAP gits jitze sowiso de nid meh. Bi hüt anere Sitzig gsi: Nöi heisst das "Qualifikationsverfahren"!! Wow, de bisch de öpper!!

Di beschti Therapie gegä Angscht isch ä gueti Vorbereitig, - u das machs du ja!

Los gibem, boxti düre!!

Gruess

Ha scho zu minere Ziit festgstellt, dass sötig wüchentlichi Träffe mit Abfroge am meischte bringe. Mir sind annodazumal z dritte gsi und sind denn bi schönem Wätter mängisch halt es bitz in d Stadt oder an Rhi anstatt z lehre aber händ doch immer öppe über s Thema Bruefskund gschwätzt und so isch doch einiges im Hirni bliebe...händ ämmel alli drei mit emene sächsi in BK abgschlosse  Du machsch das dämfalls scho richtig, nitli

Ja gäll Rölfi das het nid gänderet! Lehre muesch halt u repetiere bis ds Hirni di Sache gschnappet het.

I bi eine gsi, wo nid ring glehrt het, i ha muesse chrampfe. Anderne geits ring - u mache de nüt...!

 Roger

Ja, das muess Jede/Jedi sälber wüsse, winer sich isetzt. Fescht staht eifach: Jede/Jedi machts für sich, nid für ä Lehrer, nid für ä Chef, ganz eifach für di sälber zum Ufbou vo dire/eure Zuekunft. Bi dir Roger isch d' Rächnig ufgange (aber da isch drum Einiges a Grundwüsse vorhande), -was aber wett nid lersch u de d' Rächnig nid ufgeit?

Und  - da war ein grosses Wehklagen unter den Gestrauchelten ...

Wenn de glehrt hesch, us verreckt, hesch vlich Päch gha, ä schlächte Tag; - de muesch dr ke Vorwürf mache, hesch aber äbe nid glehrt de: "Siehe oben" Hetti doch nume...

Drum, wesech eine nid ganz kennt ud Närve voll im Griff het, isch ä Vorbereitig sicher besser: Chunts nid guet usä, ja de mues ig mir o ke Vorwurf mache. Mit Vorwürf a dig sälber läbe  -isch gar nid so eifach.

Z' Füü nie la usgah - ä guete Grundsatz!

Da chonemer nao lang witer philosofiere - u wärdes ou!

Gruess

Ds Läbe isch doch wienes Gygamfi oder äs Trampolin, wett di bewegsch, wett schaffisch  (o a dir!), - schunsch wider ufe - berchunsch Schwung.

Nid vergässe jungi Lüt

Hehe, bin ich froh han ich scho de gröschti Teil abgschlosse (Modulsystem sei Dank)

Ez hani grad de zweitletschte Tag vo minere Facharbet hinder mich brocht und bi nonig mol würki fertig... Giit no es paar Extrastunde übers Wuchenend

Han wäred minere Lehr eigentli au sälte würklich glernt und immer einigermasse durecho. Ok, defür hani au nöd ganz en 5er-Schnitt wies eigentli müest sii

Ich wünsche eu allne ganz vill Glück für eui Prüefige!!! Ihr schaffed das doch all... au dNitli Nume immer schön zueverichtlich sii...

Gruess Roger