Azərbaycanın Meksikadakı diplomatik nümayəndəliyindən AzərTAc-a verilən məlumatda bildirilir ki, fevralın 26-da Meksikanın nüfuzlu “Reforma” və “Diario Monitor” qəzetlərində Azərbaycana aid məqalələr çap olunmuşdur. Azərbaycan-Meksika ikitərəfli münasibətlərinin perspektivlərinə həsr edilmiş yazılarda, eyni zamanda, 1992-ci il fevralın 25-dən 26-na keçən gecə erməni hərbçilərinin havadarlarının dəstəyi ilə Xocalıda dinc əhaliyə qarşı misli görünməmiş qəddarlıq etmələri barədə və Azərbaycan xalqının bu soyqırımın ildönümü günündə keçirdiyi anım mərasimləri barədə ətraflı məlumat verilmişdir.
“Reforma” və “Diario Monitor” qəzetlərinin səhifələrində qeyd olunmuşdur ki, ermənilər tərəfindən törədilən soyqırımı nəticəsində 613 dinc sakin qətlə yetirilmişdir. Onlardan 63 uşaq işgəncə ilə öldürülmüş, 1.275 nəfər əsir götürülmüş, 150 nəfər itkin düşmüşdür. Ümumiyyətlə, Ermənistan-Azərbaycan, Dağlıq Qarabağ münaqişəsi nəticəsində milyondan artıq insan qaçqın və məcburi köçkünə çevrilmişdir.
Faciənin 16-cı ildönümü, həmçinin Meksikanın nüfuzlu təhsil ocaqlarından biri olan “İnstituto Tecnologico Autonomo de Mexico”nun Avropa inteqrasiyası tədqiqatı bölməsində də anılmışdır. Tədbirdə xarici ölkələrin Meksikada akkreditə olunmuş diplomatları, Meksika Xarici İşlər Nazirliyinin nümayəndələri, universitetin professor-müəllim və tələbə heyəti, eləcə də türk və Azərbaycan diasporlarının üzvləri iştirak etmişlər. Tədbiri giriş sözü ilə universitetin Avropa inteqrasiyası tədqiqatı bölməsinin direktoru professor Stefan Sberro açaraq, bu yaxınlarda Azərbaycanın Meksikada diplomatik nümayəndəliyinin təsis edilməsi barədə iştirakçıları məlumatlandırmış, bunun Azərbaycan-Meksika ikitərəfli münasibətlərinin inkişafı üçün mühüm amil olduğunu bildirmişdir. Ölkəmizin Meksikadakı müvəqqəti işlər vəkili İlqar Muxtarov çıxışında Xocalı faciəsinin Azərbaycan xalqının qan yaddaşında dərin iz buraxdığını söyləmiş, bu faciənin ermənilərin azərbaycanlılara qarşı törətdiyi vəhşilik və qəddarlıq olduğunu qeyd etmişdir. Diplomat xəritə və faktlarla Ermənistanın Azərbaycana qarşı hərbi təcavüzündən, Azərbaycan rəhbərliyinin Dağlıq Qarabağ münaqişəsinin sülh yolu ilə həlli istiqamətində göstərdiyi səylərindən ətraflı bəhs etmişdir. Müstəqilliyini bərpa etdikdən sonra Azərbaycanın daxili və xarici siyasətinin uğurları, ölkəmizin regionda, dünyada artan nüfuzu, beynəlxalq layihələrdə aparıcı rolu və yüksək iqtisadi inkişafı barədə ətraflı məlumat verilmişdir.
Tədbirdə Lider televiziyasının Xocalı faciəsi haqda çəkdiyi film nümayiş etdirilmiş, Azərbaycanın diplomatik nümayəndəliyi tərəfindən Xocalı soyqırımının 16-cı ildönümü ilə əlaqədar ispan dilində hazırlanan mətbuat məlumatı yayılmışdır.

Azərbaycanın Rusiyadakı səfirliyinin mətbuat xidmətindən AzərTAc-ın xüsusi müxbirinə bildirmişlər ki, “Memorial” Hüquq Müdafiə Mərkəzi ictimai qurumu Xocalı faciəsi ilə əlaqədar Azərbaycanın RF-dəki səfiri Polad Bülbüloğluna başsağlığlı məktubu göndərmişdir. Məktubda deyilir ki, “Memorial” Hüquq Müdafiə Mərkəzi erməni silahlı qüvvələrinin keçmiş SSRİ-nin 366-cı motoatıcı alayının köməyi ilə Xocalı şəhərinə hücumu zamanı dinc sakinlərin kütləvi qətliamının 16-cı ildönümü ilə əlaqədar faciə qurbanlarının qohumlarına və yaxınlarına dərin hüznlə başsağlığı verir.
Məktubu mərkəzin sədri, RF-nin İnsan hüquqları üzrə müvəkkili yanında Şuranın üzvü Oleq Orlov imzalamışdır.
Qeyd etmək lazımdır ki, tarix-maarifçilik cəmiyyəti kimi meydana gəlmiş “Memorial” Hüquq Müdafiə Mərkəzi fəaliyyətinin lap əvvəlindən insan haqlarının müdafiəsi məsələlərinə böyük diqqət yetirir, bu haqların kütləvi surətdə amansızcasına pozulması hallarını unutmamağa çağırır.

AzərTAc xəbər verir ki, Xocalı soyqırımının 16-cı ildönümü ilə əlaqədar Azərbaycanın Mərakeşdəki səfirliyində ictimaiyyət nümayəndələrinin, sovet dövründə Azərbaycanda təhsil almış Mərakeş vətəndaşlarının və diplomatik korpus üzvlərinin iştirakı ilə tədbir keçirilmişdir.
Azərbaycanın Mərakeşdəki səfiri Sabir Ağabəyov Xocalı soyqırımı barədə ətraflı məlumat vermişdir.
Tədbir zamanı Xocalı faciəsini əks etdirən fotostend və film nümayiş etdirilmişdir. Bundan əlavə, səfirliyin Xocalı soyqırımı ilə bağlı hazırladığı məlumat Mərakeş Krallığının Xarici İşlər Nazirliyinə, parlamentinə və digər dövlət strukturlarına, eləcə də Mərakeşdə akkreditə olunmuş diplomatik korpus nümayəndələrinə və kütləvi informasiya vasitələrinə göndərilmişdir.

Bir şəkil min sözə dəyər. Bu zərbi-məsələ inananlar çoxdur. Xüsusilə də, hadisələrə soyuqqanlı skeptisizmlə yanaşan Amerikada. Lakin nüfuzlu Corc Vaşinqton Universitetində açılmış “Xocalı: unudulmamalı faciə” adlı fotosərgiyə tamaşa edənlər 16 il əvvəl ermənilərin Azərbaycan şəhərində törətdikləri qırğından dəhşətə gəldiklərini söyləyirdilər. Universitetin Türk Tələbə Assosiasiyasının təşkil etdiyi 3 günlük sərgidə Heydər Əliyev Fondu tərəfindən hazırlanan fotoekspozisiya ilə yanaşı dünya mətbuatının Xocalı qətliamı haqda yazdıqlarını, soyqırımı qurbanlarının ağrılı xatirələrini şərhsiz əks etdirən kitabçalar təqdim olunmuş, azərbaycanlı məktəblilərin Xocalı faciəsi mövzusunda çəkdikləri rəsm əsərləri, videofilm nümayiş etdirilmişdr.
Tələbə Assosiasiyasının vitse-prezidenti Əsra Aləmdar videofilmə baxandan sonra göz yaşlarını gizlədə bilmirdi: “Qətlə yetirilən o günahsız qadınları, uşaqları görəndə insanın içinin sızıldamaması mümkün deyildir. Vətənimiz Azərbaycanın, millətimizin yaşadığı ağrını biz də yaşayırıq”.
Əsra Aləmdarın AzərTAc-a bildirdiyinə görə, Corc Vaşinqton Universitetində təşkil edilən fotosərgi amerikalıların böyük marağına səbəb olmuşdur. Təkcə birinci gün sərgiyə 200-ə yaxın adam baxmışdır.
Sərginin sonuncu günü Montana Universitetinin professoru, tanınmış jurnalist Tomas Qolts məruzə etmişdir. Cənab Qolts demişdir: “Adətən, fevralda mən müxtəlif ölkələrdə bu mövzuda çıxış edirəm. Bunun da səbəbi var. Xocalı qırğınının qanlı nəticələrini gözləri ilə görən azsaylı xaricilərdən biri kimi, bu haqda danışmağı özümə borc bilirəm”. Jurnalist Xocalı qırğınından bir gün sonra Bakıda aldığı həyəcanlı xəbərlərə sübut axtarmaq üçün Ağdama gedib. Gördüklərini bütün çılpaqlığı ilə “Vaşinqton Post” qəzetindəki redaktorlarına göndərəndə materialın işıq üzü görməsi üçün xeyli çalışıb. Erməni mənbələrinə inanmağa adət edən ABŞ mediası onun məqalələrinə yer vermək istəmirdi. Tomas Qoltsun dediyinə görə, Xocalı haqda danışdığı üçün o, dəfələrlə ermənilərin qəzəbli çıxışlarının hədəfi olub.
Tədbirdə daha sonra Azərbaycanın ABŞ-dakı səfiri Yaşar Əliyev çıxış etmişdir. O demişdir ki, bu il Xocalı faciəsi qurbanlarının xatirəsi Nyu-Yorkda, Los-Ancelesdə, Hyustonda və ABŞ-ın digər böyük şəhərlərində anılır, erməni təcavüzünün qəddar siması haqda ölkənin ən yüksək tribunalarından danışılır. Bildiyiniz kimi ABŞ Koqnresinin iki üzvü faciə ilə bağlı bəyanat vermişdir. Çoxsaylı erməni əhalisi olan Kaliforniyanı təmsil edən daha bir Konqres üzvü də qısa bəyanatla çıxış edərək Xocalı faciəsini tanımışdır.